July 1, 2018

蔡興麟.一八


GARY IS BACK! 有留意近日新聞相信都會知道GARY今年已簽返經理人陳寶儀計劃多啲返香港同大家見面! 而第一步就係錄影王牌電視節目 <流行經典50年>,除咗演繹首本名曲 為了妳.為了我,仲邀請好友李樂詩還原26年前喺MINI CONCERT度合唱過嘅 ENDLESS LOVE,聽講29號會再錄影,如果係同彭家麗唱返 現代愛情啟示錄 就正啦!


當然仲有一系列大大小小嘅媒體採訪啦,大家有興趣嘅可以重溫返 <開心大派對><守下留情><大氣候><今日VIP><東網巨星><娛樂蘋台><明報周刊> 等等。


GARY為咗今次COMEBACK唔止多咗喺面書同大家互動玩遊戲,仲特登拍咗一輯全新嘅造型宣傳照回饋粉絲 (見下圖),喺28號更會搞歌迷聚會,大家記住FOLLOW GARY嘅 FACEBOOK ACCOUNT / FACEBOOK FANPAGE / FANSCLUB PAGE 就可以知道佢嘅最新動態啦!


-----------------------
留言小教學 (不用註冊):
1. 在下方留言格內輸入留言
2. 在 'Comment as:' 一格內揀選 'Name/URL',小視窗隨即彈出
3. 在 'Name' 一格內輸入你的稱呼,'URL' 一格漏空,再按 'Continue'
4. 按 'Publish' 送出留言
-----------------------

June 1, 2017

蔡興麟.九四


熟悉本地樂壇嘅朋友都可能會知93/94年唱片市道轉差,眾單位紛紛高舉反翻版旗號,好多同GARY同期出道嘅91/92年新人都拼命掙扎但都未能過渡去95年,當然佢自己亦難逃考驗,再加埋SONY內部嘅人事變動,令剛滿約嘅GARY直入沉寂期要另謀出路,只能靠少量嘅報道得知佢嘅近況同動向,以下嘅雜誌專訪提到原來GARY當年係有過檔新公司預備進軍台灣嘅,而外型上亦見到佢正式留長髮,髮色亦由 <DON'T STOP LOVING...> 時期嘅深棑色變到'94至IN嘅金毛強。


講起國語市場,GARY其實都努力咗接近十年,早喺92年有報道指 (應該係KINN嘅關係下) 已簽滾石並打算喺6月推出首張國語專輯,計劃同 <COME BACK TO ME> 實行國粵雙打,但最後未能成事 (照我推斷係因為KINN執笠),到今次'94一役又不了了之,箇中詳情我雖無法得知,但同期正值老闆甄妮同愛徒王馨平反目打官司,公司營運難免受阻...... 有緣嘅話 (我呢個懶人成日都失驚無神更新哈哈) 之後再講講GARY 98年正式攻台,99年計劃打歌,到最後00年成功出碟嘅事跡!



蔡興麟得甄妮賞識進軍台灣

自從去年底推出過唱片後,蔡興麟在本港樂壇沉寂了好一陣子,原來GARY正積極備戰,銳意向台灣市場發展。

「與舊公司約滿後,我轉投了金音符娛樂有限公司,相信在短時間內我在香港樂壇也不會推出唱片,反而會全力在台灣市場發展。」

對於台灣市場,GARY似是胸有成竹。

「可能是以新人的身分在另一個地方發展,故此一點心理壓力也沒有,我絕對有信心會做得更加好的。」


望進軍影圈

忘記過去,展望將來是GARY的座右銘,對於未來每一個機會,他都不會放過。

「若果有機會的話,我很希望進軍電影圈,或許是因為以前在美國讀書的時候,曾經修讀話劇的關係,渴望有一展所長的機會。」

GARY深信從這一刻開始,會是他演藝事業的一個轉捩點。

為了進軍台灣,在過去的日子裡,GARY從沒有放縱自己,生活相當有規律。

「每日我會用三小時作健身運動,因為早陣子的我,看來實在太過瘦弱,現在我除了多做運動外,亦刻意增加食量,讓自己飽滿一點。」

初出道時的GARY,體型略帶BABY FAT,刻意減肥後的他由於過分瘦削,樣子看來非常憔悴,最後GARY覺得,還是肥一點較好。

「作為一個全面的歌手,舞蹈這一環也不可忽視,其實我已跟排舞老師練習了好一段日子,技巧亦已大大提升。」

整裝待發的GARY,現在已隨時準備聽從公司為他安排的一切。

「稍後,我便要到台灣一趟,為自己首張國語大碟進行錄音。」


機緣巧合

其實簽約金音符,GARY認為是機緣巧合。

「一次偶然的機會遇見AUNTIE JENNY(甄妮),閒談間相約改天飲茶見面,由於當時自己剛與舊公司約滿,她便有簽我成為她公司旗下藝人的念頭,這一切都是緣分的安排。」

認識甄妮,GARY覺得是自己的一點福分。

「AUNTIE JENNY的人生經驗相當豐富,她教懂我很多事情,例如歌唱技巧、舞台上的演繹方法,還有如何處理人際關係......」

曾經有人批評GARY待人處事尚未成熟,直腸直肚容易開罪別人,故此人際關係未如理想。

「對於傳言我也曾反省過,而且確實覺得自己待人處事未夠圓滑,但不能夠一下子便改變過來,始終覺得經一事,長一智,人生經驗是需要累積,我有信心可以做得更好。」



- - - - - - - - - - - - - - - - - - - - - - - -

喺度再貼一篇同年鄒靜嘅雜誌專訪比大家,係咪好奇怪點解我要貼阿靜嘅嘢喺呢度呢? 好似大纜都扯唔埋咁,其實人生真係好奇妙,雖然我好鍾意GARY同阿靜,鍾意到各自開咗個BLOG,但我從來都無將佢地CONNECT埋一齊,直至睇到呢篇專訪先知原來阿靜同GARY係好朋友,的確令我好驚喜,好想同大家分享呢種解釋唔到嘅巧合,睇嚟呢個世界冥冥中係有啲磁場影響住......


想點就點 與蔡興麟飲茶睇戲絕非拍拖 鄒靜強調自我無謂做戲咁做

早前,筆者前往某酒店的咖啡室做訪問,途中遇上了鄒靜,彼此寒暄數句後便離開;其後,筆者在咖啡室內竟看見鄒靜與蔡興麟,於是不期然地作出以下的猜想:他們在拍拖或是鄒靜為求宣傳而故意出現,因為筆者曾告知她會到咖啡室去。

實情如何?當然要找當事人來解說了。

筆者故事捉挾鄒靜說:「你同蔡興麟好熟?」

鄒靜知道筆者怎麼想,於是回應道「KAREN,我對你嘅IQ好有信心,你唔好以為一男一女約出街飲茶,就一定係拍拖啦!」

當然,男女單獨約會不能代表甚麼,但這亦不能否定雙方有發展的可能。

原來當日他們亦遇上了另一位記者,其後蔡興麟便被記者追問關於他們拍拖的事。

鄒靜對筆者說:「事後蔡興麟講番比我知,話啲記者猛咁追問我地拍拖嘅事,又同蔡興麟講,叫佢唔駛唔認,我聽咗之後覺得好好笑。」

「你叫我地認乜嘢啫,我地根本就唔係拍拖,唔係又點認喎。」鄒靜稍停一會兒,說:「原本約咗蔡興麟去睇首映,佢怕我會驚惹上緋聞,去之前仲問去唔去,我話怕乜嘢,鍾意去睇首映就去,點解要因為怕緋聞而唔去。」


易被誤解

筆者問:「咁,究竟你同蔡興麟又係點?」

「朋友囉,其實好多時都會約啲朋友出嚟飲茶傾偈,今日同呢個,明日又同第二個,如果飲吓茶就話拍拖,咁好容易俾人話我花心添。」

鄒靜說話時的語氣有點「倔」,跟她不相熟的人定必以為她的態度欠佳。

她還這樣說:「如果我真係拍拖的話,都唔鍾意同男朋友坐响咖啡室到飲茶傾偈。」

換言之,鄒靜與蔡興麟並非拖友,亦無意發展甚麼地下情,事實只是一場誤會罷。

那麼她是否故意出現,作自我宣傳呢?

「我估到你會咁樣諗,其實,初出道時都俾人話過我博宣傳,但係,我唔係,如果真係咁識得宣傳自己,就唔駛成日都唔見報。」

「我知道你會响咖啡室,但係我唔想因為要怕緋聞,怕呢樣怕嗰樣,影響到自己嘅生活,同朋友飲茶又唔係唔見得光嘅,點解要刻意避開啫。」

從簡短的對話中,筆者已感覺到她是個性格自我的女孩。

她說:「我為自己而生活,唔想因為係藝人,而影響自己嘅生活,平時我鍾意點就會去做,當然唔係犯法嘅事,如果因為自己係藝人,就話樣樣要避忌,咁樣做人,就覺得會好辛苦。」


不想變改

就在她接受筆者訪問當天,觀其束着馬尾,淡掃蛾眉赴會,亦沒有因此而拒絕拍照;而且在咖啡室內,她坐得很是隨便,把櫈子親如家中的沙發般,半躺在那裏跟筆者聊天,挑剔的人士會指說她沒有儀態,對此,她不予理會。

鄒靜說:「有人會話我應該要顧及形象,顧住自己嘅身分,但我覺得自己有乜嘢身分啫,我都係一個普通人,唔需要因為自己係藝員,而俾自己咁大嘅壓力。」

「我都知道,咁樣對自己可能無好處,可惜呢個係我嘅性格,我鍾意搭巴士就搭巴士,鍾意搭地鐵就搭地鐵,點解要改啫!」

鄒靜突然喃喃自語地說些甚麼,原來她想起祖父的一句說話:「人若改性,非死即亡。」

然後,她對筆者說:「如果你有一日見到我,扮到花枝招展、儀態萬千咁,你可能好快再見唔到我。哈、哈、哈......」

雖然這次訪問沒有「挖」到甚麼猛料,但總算加添了對鄒靜的認識,並且就她與蔡興麟的友誼關係作過求證了。



photo credit: gary & his team@weibo (1 of 4)

-----------------------
留言小教學 (不用註冊):
1. 在下方留言格內輸入留言
2. 在 'Comment as:' 一格內揀選 'Name/URL',小視窗隨即彈出
3. 在 'Name' 一格內輸入你的稱呼,'URL' 一格漏空,再按 'Continue'
4. 按 'Publish' 送出留言
-----------------------

July 1, 2013

蔡興麟.九三


1993年係GARY活躍樂壇嘅最後一年,對上一年公司做到嘅都幾乎做晒:搵一線製作人做碟、搵師姐合唱、上節目、做主持、做MODEL、開生日會、開歌迷會、拎自己隻汪汪出嚟做訪問...... 但即使有好嘅成績都要靠不斷宣傳曝光去維持,更何況係呢個一年先出一隻碟嘅 '學生歌手',唔再係新人 / '樂壇寵兒',都唔使提家駒嘅離世,歌星之路第三年唔止難行,仲行唔到落去......

SML6026 (CD/CASSETTE)

DON'T STOP LOVING...




你話公司唔捧佢咩? 又未算,偶像包裝當道,至少都幫佢執過晒啲形象,第一眼留意到嘅係頭髮長咗同染棑咗,亦唔使再著老西,開始自己披披搭搭加啲ACCESSORIES,GARY自己亦努力減肥減水腫減走BABY FAT(聲稱減咗30磅),成個人SHARP咗。


歌路方面,第三代監製盧金源老師完全抹晒GARY高音清聲紮實激得起嘅優點,反而180度轉新路比佢行:唱迷幻中快版歌同深情內歛慢歌,把聲同感情收得入咗好多,而歌詞亦比之前兩隻碟更有深度,對關係嘅描寫多咗深咗,亦有探討愛情觀,雖然啲嘢好似轉晒,但偏偏又搵到好多同上一隻碟相似嘅嘢......


首波主打 DON'T STOP LOVING... 改編土屋昌巳87年嘅同名作品,喺度要讚蘇德華老師手電結他編曲,唔知仲以為自己聽緊 石頭記,同上一隻碟都係佢編嘅ACOUSTIC啲嘅 如今 完全唔同,好有心思! SONY算勇,唔整隻穩陣BALLAD力谷,反而做隻懶懶閒又有少少挑逗嘅,我諗佢地係有諗過度過幫姣得起嘅GARY突圍,好似一句 '撕開封閉的夜' 就聽得出蔡生又扮哥哥唱歌,SONY衰唔晒,都叫做出過吓錢請咗兩位美女伴舞,令呢首歌成為GARY第一首亦係唯一一首跳舞歌。


GARY TONG老師上年作咗 講一句 比GARY,好係我杯茶,而今次就幫手編一首重節奏嘅 暫時相戀,呢首同 DON'T STOP LOVING... 嘅愛情觀完全相反,夕爺大筆一揮,將盧永強老師填嘅 '不應該疲累身影中 想找一晚尊重' 嘅耐心等耐心愛完全推翻,變為 '只顧心頭暖 誰理會是極短',完結峰迴路轉嘅A SIDE愛情五部曲 (希冀>甜蜜>淒怨>疑慮>放任),唔知咁啱定咁橋,暫時相戀 嘅另一句歌詞 '沒法可知如何留住浪漫 易說但難辦' 似係呼應返上一隻碟幫GARY寫嘅 永遠浪漫


同樣係結尾歌,B SIDE代表 得過且過暫時相戀 一樣又係HEA HEA地咩都唔想理,但西味重,西詞包括 '愛你仿似攀登帝國大廈' 同 '我愛本性嬌羞那個嬌娃',入面又有把姣女和聲對唱幾句,西爆,但西人如我當然鍾意啦哈哈!


今次隻碟最特別嘅係有兩對孖寶,兩PAIR都係由一首本地原創歌加一首日本改編歌所組合而成,而各自嘅歌名風格或歌詞內容都非常相近,首先介紹 我這裡有你.你這裡有我 同 後悔的眼光.讓眼晴說謊,淨係睇歌名對得咁工整就知咩事啦!


我這裡有你.你這裡有我 改編自 TO BE CONTINUED 同年單曲 君とずっと...くらしたい (睇嚟監製好鍾意呢隊喎,前後兩隻碟已經COVER咗佢地成三首歌),可以話係上一隻碟嘅情歌主打 COME BACK TO ME 嘅延續,配合潘偉源老師一貫深情嘅歌詞 '深深這份情 應轟烈燒過 熱烈的燒過 狂熱了',難怪成為派台歌之一。


至於由監製盧老師親自作曲嘅 後悔的眼光.讓眼晴說謊 係小弟嘅心水,對比上一隻碟嘅K歌代表 我的心仍然被她佔領 唔止一樣排喺B3位置,亦同樣由盧東尼老師編曲 (係喎碟入面兩首監製原創作品都係佢編,可以話係另一PAIR監製孖寶! 等我下面岔開再講),仲特登好似 得過且過 咁加咗幾句女和聲入去,好似佢地兩個情深對唱咁,效果唔錯,不過唔鍾意一句歌詞 '如像眷顧小孤雛'。


監製孖寶第二擊:馮鏡輝老師上次作咗首金曲 現代愛情啟示錄 比GARY,今年繼續度身訂造同類型柔情小調 追追躲躲,好適合做古裝片嘅主題曲架!


講返原先想講嘅另一對孖寶 最後一闕小怨曲 同 落泊心曲 先,兩首都係有心谷嘅歌,前者既係金培達老師嘅作品亦係第二主打,後者則改編稻垣潤一91年單曲 CONGRATULATIONS,除咗放喺B1位置,更由GARY親自填詞,而兩首嘅相同之處在於主題都以 '奏曲' 比喻愛情。


最後一闕小怨曲 歌名淒美,配合小提琴編曲可謂一絕,開頭掃嗰幾下結他聲更倍覺冷清,而 落泊心曲 嘅歌詞就充滿詩意,'冬季遍夜下雪破白晝' 同 '演奏每段樂韻心內扣' 都填得好靚,難得GARY小小年紀已經咁好文采。



今次宣傳期比上一隻碟遲,上年夏天已經去緊,講吓暑假玩啲咩奧運睇啲乜,今年 DON'T STOP LOVING... 大約中秋先派台,當時嘅音樂節目同場仲有佢兩位好 '家姐' 一齊出鏡:王靖雯宣傳 SUMMER OF LOVE,彭家麗宣傳 <超能幹探>,而喺第一隻碟入面為佢作曲嘅倫永亮老師同埋同期新人李國祥就宣傳 總有你鼓勵,至於幾乎次次都同佢同期宣傳嘅劉文娟,今年亦較啱咁上下時間宣傳 愛戀總不可長久,而 最後一闕小怨曲 更加係冬天先PLUG,當時仲去埋 <翡翠歌星賀台慶> 同籌款節目配合宣傳。

白版:最後一闕小怨曲 (CXD148)

講到碟入面覺得較為失色嘅作品係改編和田現子88年單曲 だってしょうがないじゃない 嘅 你為何讓戀愛倦了,個歌名已經...... 歌詞仲勁 '我願重拾你真摰地笑 如從前熱烈太美妙' 美妙都填得出...... 跟住唱啲 'HA' 又 'HA' 得好勉強咁...... 好彩編曲同 DON'T STOP LOVING... 一樣比較迷離,總算救返首歌。


最後想特別講吓 如果明天,雖然呢首歌表面上係一首小品情歌,歌詞 '真心交出每天' 亦呼應返上一隻碟 真愛 嘅 '真心去愛',但同時亦好啱作為GARY同FANS之間嘅歌,喺呢度我想送返入面幾句歌詞比GARY,希望佢知道到今時今日仲有人一路支持蔡興麟:

多感激終得你與我走過未來 快樂與悲哀
如果明天 終生可擁著你肩
但願停留在你眼前 一生都不會搬遷
路是多遠 有你伴我歷險
多少的風雨 都不可改變 真心交出每天



時也命也,我成日覺得94年係樂壇嘅分水嶺,音樂類型同人事變動都好大,而SONY一家人亦未能倖免,個個苟延殘喘半停產:大家姐劉美君聲帶生繭,沙住聲錄音,二家姐彭家麗做 日女人 做到死心,退下火線教唱歌,ELLEN姐陳雅倫雖然出足兩隻碟但始終做唔到第二個卿卿,只能喺樂壇 隨便坐,'好兄弟' 陸家俊得罪人多仲要跌傷,無奈避走讀書,至於GARY...... 記得GARY喺網誌上提過,自己19歲時曾誤入一條黑暗隧道,我諗唔多唔少都關解約/失意樂壇一事,屬於蔡興麟嘅廣東歌,係好係差都唔應該得30首咁少!

'93小鮮肉? 一睇就知蔡生幾'保守'啦... (簽名照為 '娛記正傳' 珍藏展覽品)

photo credit: gary & his team@weibo (15, 16 of 21)
- - - - - - - - - - - - - - - - - - - -
[last updated in May 2020]

-----------------------
留言小教學 (不用註冊):
1. 在下方留言格內輸入留言
2. 在 'Comment as:' 一格內揀選 'Name/URL',小視窗隨即彈出
3. 在 'Name' 一格內輸入你的稱呼,'URL' 一格漏空,再按 'Continue'
4. 按 'Publish' 送出留言
-----------------------